ಮೂಡುಬಿದಿರೆ: ಆಟಿ ತಿಂಗಳ ಕಷ್ಟದ ದಿನಗಳ ನೆನಪಿಗಿಂತ ಜಾನಪದ ಬದುಕಿನ ಸೊಗಡನ್ನು ಪರಿಚಯಿಸುವ ‘ಆಟಿಡೊಂಜಿ ದಿನ’ದ ಮೂಲಕ ಸಂಸ್ಕೃತಿ, ಸಮಾಜದ ಏಳಿಗೆ ಹಾಗೂ ಯುವಜನರ ಜವಾಬ್ದಾರಿಯ ಕುರಿತು ಚರ್ಚೆ ನಡೆಯಿತು. ಬ್ರಹ್ಮಶ್ರೀ ಗುರುನಾರಾಯಣ ಸ್ವಾಮಿ ಸೇವಾ ಸಂಘ, ಶ್ರೀ ನಾರಾಯಣ ಗುರು ಸೇವಾದಳ ಹಾಗೂ ಶ್ರೀ ನಾರಾಯಣ ಗುರು ಮಹಿಳಾ ಘಟಕದ ಜಂಟಿ ಆಶ್ರಯದಲ್ಲಿ ನಡೆದ ಆಟಿಡೊಂಜಿ ದಿನ ಹಾಗೂ ಪದಗ್ರಹಣ 2026 ಕಾರ್ಯಕ್ರಮವನ್ನು ಉದ್ಘಾಟಿಸಿದ ಮುಖ್ಯ ಶಿಕ್ಷಕಿ ಜಯಂತಿ ಕಟೀಲ್ ಮಾತನಾಡಿ, ಆಟಿ ತಿಂಗಳಲ್ಲಿ ಇಂದು ಕಷ್ಟದ ದಿನಗಳಿಲ್ಲ. ‘ಆಟಿಡೊಂಜಿ ದಿನ’ ಜಾನಪದ ಶೈಲಿಯಲ್ಲಿ ಆಚರಿಸುವ ದಿನವಾಗಿದೆ. ವರ್ಷದ ಪ್ರತಿಯೊಂದು ತಿಂಗಳಿಗೂ ಮಹತ್ವವಿದ್ದು, ಹಿಂದೂ ಧರ್ಮದ ಹಬ್ಬಗಳ ಸರಮಾಲೆ 12 ತಿಂಗಳಲ್ಲೂ ಬರುತ್ತದೆ ಎಂದರು.
ಆಟಿಯ ಮದಿಪನ್ನು ನೀಡಿದ ನಿವೃತ್ತ ಮುಖ್ಯ ಶಿಕ್ಷಕಿ ಗುಣವತಿ ರಮೇಶ್ ಅವರು ಆಟಿ ತಿಂಗಳ ಮಹತ್ವ, ಕಷ್ಟ-ಸುಖ ಹಾಗೂ ಸಮಾಜದ ಏಳಿಗೆಯ ಕುರಿತು ಮಾತನಾಡಿದರು. ಸಮಾಜದ ಯುವಕ-ಯುವತಿಯರಲ್ಲಿ ಮದುವೆ ಜೀವನದ ಬಗ್ಗೆ ಹೊಸದಾಗಿ ಮೂಡುತ್ತಿರುವ ಕೆಲವು ಯೋಚನೆಗಳು ಸಮಾಜಕ್ಕೆ ಹಾನಿಕಾರಕವಾಗಬಹುದು. ಈ ಬಗ್ಗೆ ಸಮಾಜವು ಈಗಲೇ ಎಚ್ಚೆತ್ತುಕೊಳ್ಳುವ ಅಗತ್ಯವಿದೆ ಎಂದು ಹೇಳಿದರು.
ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ನವೀನ್ ಚಂದ್ರ ಕರ್ಕೆರ ವಹಿಸಿದ್ದರು. ಸೇವಾ ಸಂಘದ ಮುಂದಿನ ಸಮಾಜಮುಖಿ ಕಾರ್ಯಕ್ರಮಗಳಿಗೆ ಸಮಾಜದ ಬಂಧುಗಳ ಸಹಕಾರವನ್ನು ಕೋರಿದರು. ಮುಖ್ಯ ಅತಿಥಿಯಾಗಿ ಮೀನಾಕ್ಷಿ ನಾರಾಯಣ ಪಿ.ಎಂ. ಆಗಮಿಸಿ ಕಾರ್ಯಕ್ರಮಕ್ಕೆ ಶುಭ ಹಾರೈಸಿದರು. ನಾರಾಯಣ ಗುರು ಸೇವಾದಳದ ಅಧ್ಯಕ್ಷ ಶಶಿಕಿರಣ್ ಕಲ್ಲಬೆಟ್ಟು ಹಾಗೂ ನಾರಾಯಣಗುರು ಮಹಿಳಾ ಘಟಕದ ಅಧ್ಯಕ್ಷೆ ಸವಿತಾ ಜಿತೇಶ್ ತಮ್ಮ ಅನಿಸಿಕೆಗಳನ್ನು ನೀಡಿದರು. ಹೊಸದಾಗಿ ಆಯ್ಕೆಯಾದ ಶ್ರೀ ನಾರಾಯಣ ಗುರು ಸೇವಾದಳ ಹಾಗೂ ಶ್ರೀ ನಾರಾಯಣಗುರು ಮಹಿಳಾ ಘಟಕದ ಪದಾಧಿಕಾರಿಗಳ ಪದಗ್ರಹಣವೂ ನಡೆಯಿತು.
ಲಕ್ಷ್ಮಣ ಪೂಜಾರಿ, ಉಷಾ ಮಧುಕರ್, ಪಿಕೆ ರಾಜು ಪೂಜಾರಿ, ಪ್ರಭಾಕರ ಸುವರ್ಣ ಕರ್ನಿರೆ, ಸವಿತಾ ದಿನೇಶ್, ದಿನೇಶ್ ಪೂಜಾರಿ ಮಾರೂರು, ಮಮತಾ ನಾರಾಯಣ್, ಪೂರ್ಣಿಮಾ ಬಾಲಕೃಷ್ಣ, ಸುಶ್ಮಿತಾ ಕೋಟ್ಯಾನ್, ಹರೀಶ್, ಸ್ಮಿತಾ ಭಾಸ್ಕರ್, ಸಂಪತ್ ಪೂಜಾರಿ ನೆತ್ತೋಡಿ, ಸುರೇಖ ಹರೀಶ್ ಹಾಗೂ ವಿಶಾಲ ಉಮೇಶ್ ಉಪಸ್ಥಿತರಿದ್ದರು.
ಲಕ್ಷ್ಮಣ ಪೂಜಾರಿ ಪ್ರಧಾನ ಕಾರ್ಯದರ್ಶಿಯಾಗಿದ್ದು, ಉಷಾ ಮಧುಕರ್ ಮಾತೃ ಸಂಘದ ಸಾಂಸ್ಕೃತಿಕ ಕಾರ್ಯದರ್ಶಿಯಾಗಿದ್ದಾರೆ. ಪಿಕೆ ರಾಜು ಪೂಜಾರಿ ಸಂಘದ ಸ್ಥಾಪಕ ಸದಸ್ಯರು ಹಾಗೂ ಮಾಜಿ ಅಧ್ಯಕ್ಷರಾಗಿದ್ದು, ಪ್ರಭಾಕರ ಸುವರ್ಣ ಕರ್ನಿರೆ ದಾನಿಯಾಗಿದ್ದಾರೆ. ಸವಿತಾ ದಿನೇಶ್ ಮಹಿಳಾ ಘಟಕದ ಮಾಜಿ ಅಧ್ಯಕ್ಷೆ, ದಿನೇಶ್ ಪೂಜಾರಿ ಮಾರೂರು ಸೇವಾದಳದ ಮಾಜಿ ಅಧ್ಯಕ್ಷರಾಗಿದ್ದಾರೆ.
ಮಮತಾ ನಾರಾಯಣ್ ಹಾಗೂ ಪೂರ್ಣಿಮಾ ಬಾಲಕೃಷ್ಣ ಮಹಿಳಾ ಘಟಕದ ಉಪಾಧ್ಯಕ್ಷರಾಗಿದ್ದು, ಸುಶ್ಮಿತಾ ಕೋಟ್ಯಾನ್ ಕಾರ್ಯದರ್ಶಿ, ಹರೀಶ್ ಸೇವಾದಳದ ಕಾರ್ಯದರ್ಶಿ, ಸ್ಮಿತಾ ಭಾಸ್ಕರ್ ಕೋಶಾಧಿಕಾರಿ, ಸಂಪತ್ ಪೂಜಾರಿ ನೆತ್ತೋಡಿ ಸೇವಾದಳದ ಕೋಶಾಧಿಕಾರಿ, ಸುರೇಖ ಹರೀಶ್ ಹಾಗೂ ವಿಶಾಲ ಉಮೇಶ್ ಮಹಿಳಾ ಘಟಕದ ಜೊತೆ ಕಾರ್ಯದರ್ಶಿಗಳಾಗಿದ್ದಾರೆ.
ಕಾರ್ಯಕ್ರಮದಲ್ಲಿ ಸುಶ್ಮಿತಾ ಕೋಟ್ಯಾನ್ ಸ್ವಾಗತಿಸಿದರು. ಸ್ಮಿತಾ ಭಾಸ್ಕರ್ ವಂದಿಸಿದರು. ಶ್ರೀರಾಜ್ ಸನಿಲ್ ಕಾರ್ಯಕ್ರಮ ನಿರೂಪಿಸಿದರು. ಕೊನೆಯಲ್ಲಿ ಆಟಿ ತಿಂಗಳ ಹಳ್ಳಿಯ ಸೊಗಸಾದ ಸವಿಭೋಜನವನ್ನು ಸವಿಯಲಾಯಿತು. ಸುಮಾರು 800ಕ್ಕೂ ಹೆಚ್ಚಿನ ಸಮಾಜದ ಬಂಧುಗಳು ಭಾಗವಹಿಸಿದ್ದರು.
